Sinn un Unsinn sitze in de Kneip,
weil das ihr scheenschder Zeitvetreib.
Je mehr se drinke vun de Biere,
je lauder duun se dischbediere.

De Sinn hat schdeeds e Ziel vor Aue,
de Unsinn lääbt defier ins Blaue,
de Sinn, der schafft un leed sich krumm,
de Unsinn find dass bleed un dumm!

Ihr Redde wärre immer doller,
so wie die Schwätzer langsam voller.
Sie leije schließlisch schdumm am Disch -
was joo ned vewunnerlisch.

Der Ääne halt de Anner feschd -
in dem Zuschdand aa es beschd.
Was zeischd, dass Sinn un Unsinn
am End doch wie zwei Zwilling sinn!

*****

- Vorschaubild: Penrose-Dreieck, Urheber: Tobias R.-Metoc, CC BY-SA 2.5, via Wikimedia Commons
- Impossible Crate (Unmögliche Lattenkiste). Urheber: DemonDeLuxe (Dominique Toussaint), CC BY-SA 3.0, via Wikimedia Commons