Dorsch‘s Joor, doomools un heit!

Friehjoor

Im Friehjoor hat ma doo de Gaade
umgebraab mit Mieh un Schpade,
un uff de Felder jauchzt de Bauer,
der Duft blieb dann vun langer Dauer,
hänge in de Frühlingsluft,
statt wie erhofft, er rasch vepufft!

Summer

Im Summer, wenn's so rischdisch heiß
-10 Penning koschd e Kuchel Eis -
doo schderzt sisch jeder mit viel Mut
im Schwimmbad in die kühle Flut.
Owens hat ma dann geschwenkt,
un ordentlisch sisch ingeschenkt!

Herbscht

Wenn die Kaschdannje uff de Kopp dir knalle,
die Tembradure wie die Blätter falle,
wenn du die Kält schbierschd iwwerall -
dann isch es Herbscht uff jede Fall!
Ma merkt uff ämoo, dass ma älder,
mit jedem Daa, der immer kälter.

Winter

Wenn die Daa jetzt Daa fier Daa,
kerzer werre, was aa klar,
die Veschell aa schun sinn im Süde
ma sisch vor Erkältung jetzt muss hiete,
dann schdeht de Winter vor de Dier,
so war‘s halt frieher, glaab dass mir!

...un heit?

An Oschdre gebbts schunn Weihnachtmänner,
im Juli kannsch de Schieer kaafe,
im Herbschd hat aa de greeschde Penner,
im Internet sei Plaanung laafe -
fier de Urlaub mit Verona,
doch zwischedorsch kam dann Corona!

Nix merkt ma noch vun Jooreszeide,
es ganze Joor duuds em veleide,
ma kann sisch wunnre odder fluche,
e Jooreszeit, kannschd du bei Google suche!

Denn Jooreszeide gebbts ned mehr,
der Ähn nemmt es leicht, der Anner schwer!
Doch loss dass Läwe ned vemiese,
du jede Daa genieße!

*****

Fotos: Herbert Kihm